صدى الشعب – كتبت رنا حداد
نشرة “أخبار البلد مع بنت البلد“
أهلاً بكم في النشرة اللي بتحاول تلحق أخبارنا بدون عرط “العاجل” ، وبتنقل العناوين من الشارع مش من لسان “ناطق” و “مصدر” … من وعودنا اللي بتضلها وعود… لحد أحلامنا اللي بتكبر مع كل مواطن عنده صبر… وصبره صار عملة نادرة!
استراتيجيتنا الوطنية للقراءة
وأخيراً، أطلقوا شعار “نحو أردن قارئ”… خطوة عظيمة، صح؟ بس خلينا نحكي بصراحة: لو الأردنيين قروا فاتورة الكهرباء والماء “بعمق”.. كل يوم، كنا صرنا أكثر الشعوب ثقافة بالعالم!!! ومع هيك، الأمل موجود… يمكن هالمرة يصير القارئ الجديد… هو المواطن اللي يعرف يقرأ الفاتورة قبل ما ينحرق رأسه.. وجيبته .
صحة مالية على الطريقة الأردنية
تقرير البنك المركزي 2024 كشف تحسن وضع الأردنيين مقارنة بعامي 2022 و2023. المواطن “المتأقلم” صار عبقري في فنون التوزيع: فاتورة الكهرباء، مشتريات البقالة، وراتب الشهر… رقصة سامبا يومية لا تقل تراجيديا ولا كوميديا،، عن أي عرض مسرحي.
الخلاصة؟ الاقتصاد بيتحسن، الأردني بيتعلم يتصرف… والتأقلم صار العلاج النفسي الأساسي، لأنه إذا ما تأقلمت، يمكن تصيبك أزمة تأقلمية لا سمح الله !
حواجز.. وكنك زلمة اقفز..
إزالة الحواجز لحجز أماكن السيارات من أمام البيوت والشوارع خطوة حلوة، بس الشارع بيضحك علينا! قال بقول عقبال إزالة الحواجز عن حقوقكم: التعليم، الصحة، والعيش الكريم.
ترى المواطن صار يمشي بين الحواجز وكأنه في مسابقة قفز عن الحواجز.. حتى يوصل لحقه.
وعلى فكرة.. حواجز الحياة أغلى وأصعب من أي موقف سيارات… وكل يوم تمرّ بدون حادث هو انتصار بحد ذاته!
الكذب والصّدق بحياتنا،،
يقطع الكذب نصف العالم… والصّدق لسه يحاول يلبس حذاءه! وفي نشرتنا، إحنا منشوف كل شيء بسرعة البرق… إلا الحقيقة، اللي لازم تركض وراها مثل طفل ضايع في السوق…
وفي نهاية النشرة، تذكروا: الحياة شارع مليان حواجز، الاقتصاد، رقصة معقدة، والوعود كثير منها مجرد دمى على الرف… بس الضحك والمثابرة، والقدرة على رؤية الحقيقة وسط الفوضى… هي اللي بتخلينا نكمل المشوار… ونبقى، رغم كل شيء، بنحب البلد، وكثير كمان.
ألقاكم في نشرة قادمة
مع تحياتي
بنت البلد.
