صدى الشعب – كتبت رنا حداد
أخبار البلد مع بنت البلد
الأمن العام : الأجهزة الأمنيّة تتعامل مع قضية تحقيقية في منطقة ماركا الجنوبية والتحقيقات الأولية في القضية أشارت إلى قيام مجموعة من الأشخاص بتخزين كمّيات من المواد المتفجّرة داخل منزل في منطقة ماركا الجنوبية
خبراء المتفجّرات من سلاح الهندسة الملكي والاجهزة الامنية قاموا بالتعامل مع تلك المواد .
بطبيعة الحال هناك من يسهرون يحرسون على الوطن ويحمون العرض وهناك من يستعرض، انتهازيون يتباهون بالكلمات، لا يخجلون من الشماتة، يتغنون بما لا يملكون واتحدث هنا عن رجولة الانتماء الحقيقية.
يا ريت تبيعونا سكوتكم وتوفروا “نيتكم” ونت كم.
بلاد الشام ستشهد حرارة أعلى من المعتاد بتموز وآب،،
حلو بس للأمانة المهنية كان يجب القول أن العالم كله يعاني هذه الأيام من إرتفاع حرارة غير مسبوق،، عشان نفرح إنه مش لحالنا من نعاني تحت شمس هذا الكوكب الخربان أبو أو زون مخزوق ع رأي العلماء.!
تجار الألبسة مصدمون من تراجع المبيعات بنسبة 70%
بعد هذا الخبر أعتقد لابد أن نجلس وجها لوجه مع الحكومة ونفهمها إنه ما عم نقدر نشتري اواعي إلنا ولعيالنا لانه بنصرف عليها،
خلص هالحكومة شاخت وممكن يطلعلها تقاعد تصرف منه ع حالها وتتركلنا حق بنطلون بدون جيوب أكيد لانه ما في شي نحطه فيهم.!
خبر يقول بأن ارتفاع الأجور الطبية في الأردن يفتح ملف التأمين الصحي من جديد.
حلو يعني صار فينا نمرض براحتنا طالما في نية لفتح الملف..
بس ع علمي انه هالملف وصفاته الطبية هي : بكرا أحلى والقادم أجمل مع 3 كبسولات معلش يوميا، وعدد 2 “تحاميل” جمايل بلقاءات وزارية كلها برازق وبيتي فور،، هي لفتح الملفات مش أكثر.
خبر صحي يقول ان تناول “الجِبن” بكسر الجيم، له دور كبير لاكتساب صحة عقلية أفضل في الشيخوخة.
من وجهة نظري اللي ما الها اية أهمية تذكر ، اعتقد الخطأ في تشكلي كلمة “الجبن” فكان لابد من ضم الجيم ليصبح الخبر لا غبار عليه..
ف الجُبن بالضم، والرعي الجائر هو مرضنا الأول والأخير على هذه الأرض.
عزيزي المار على هذه النشرة اقرأها وانت مكيف ومصيف تحت المكيف، لانه ما بعرف فاتورتك الكهرباء.. كم رح تضل مكيف بس تشرف..
ع كل وع رأي جدتي الله يرحمها ويرحم امواتكم جميعا “حياة بدها تمشي”.. حماكم الله من الحر ووهبنا كل حُر بضم الحاء.
ألقاكم في نشرة “بلدية” مقبلة
مع تحيات
بنت البلد..
