صدى الشعب – كتبت ليندا الكركي
التطوع… مش طريق، هاي حياة
بمناسبة اليوم العربي للعمل التطوعي
جربنا… وتغربنا… وخفنا… وبكينا… وتكرمنا.
سهرنا… وساعدنا… وضحكنا من قلب موجوع.
من سنين طويلة، والميدان العربي يشهد طاقات عظيمة قررت تمشي بطريق اسمه “تطوع”.
لكن الحقيقة؟ هو ما كان مجرّد طريق… هو حياة كاملة.
حياة عاشها متطوّعون من مختلف الدول العربية، تنقلوا من بلد لبلد، ومن مبادرة لمبادرة، وهمهم الأول والأخير: الإنسان.
من لبنان إلى مصر، من إسطنبول إلى الأردن، ومن قلب كل مخيم وكل شارع، تلاقينا، وتشاركنا التعب… والضحكة.
دخلنا مخيمات كصبرا وشاتيلا، وشاهدنا بعيوننا البنايات اللي مخرّمة رصاص، وكل زاوية فيها بتحكي حكاية وجع.
رممنا، طيّنا الجدران، نضّفنا، رسمنا… واشتغلنا بإيدينا وبقلوبنا.
ضحكنا، مو لأن الدنيا كانت بخير، بل لأن الضحك كان سلاحنا بوجه اليأس.
وفي لحظات الخوف، لما كانت المدن تغلي والتوتر يعمّ، ضلّينا… مش عناد، بل إيمان إن وجودنا مهم، وإنه في ناس بتنطرنا… حتى لو بكلمة طيبة.
اشتغلنا مع الأطفال، مع المرضى، مع اللاجئين، مع كل شخص كان محتاج دعم، ولو بسيط.
وفي أزقة مصر، لما التقينا بأهلنا من السودان، وغنينا معهم نشيدهم الوطني، بكينا سوا… لأن الغربة وحدة، والوجع واحد.
ما كنا نعرف بعض بالبداية، لكن اليوم… صرنا عيلة.
عيلة كبيرة، متطوّعة، عربية، انجمعت تحت مظلة الاتحاد العربي للعمل التطوعي، بقيادة الدكتور يوسف الكاظم، ونائبه الأستاذ هشام الريدة، اللي آمنوا بقدرة التطوع على بناء إنسان قبل ما يبني مؤسسة.
هذا الاتحاد كان منصّة، ومساحة، وحاضنة حقيقية. فتح الأبواب، وربطنا ببعض، وأعطانا فرص نمدّ فيها إيدينا للخير… ونرجّع الأمل.
واليوم، ومع انطلاق اليوم العربي للعمل التطوعي تحت شعار “التطوع… نبض حياة”، بنوقف كلنا نحتفل… مش بيوم، بل بمسيرة.
مسيرة تعب، وخوف، ودمع… لكن كمان، مسيرة ضحك، وأمل، ونجاح.
وإلنا، ولكل متطوع عربي… بنقول: المشوار ما خلص.
لسّا في أبواب بدها تُفتح، ولسّا في أيادي تنتظر الدعم، وقلوب محتاجة تسمع كلمة “إحنا معكم”.
شكرًا من القلب للاتحاد العربي للعمل التطوعي، لأنه مش بس جمعنا… بل آمن فينا، وفتح لنا فضاءات نكبر فيها بالمعنى، ونصنع فيها فرق حقيقي.
وفي كل عام، بيجدد الاتحاد رسالته:
“التطوع مش جهد فردي، بل وجدان عربي واحد… ينبض بالحياة، وبالخير، وبالإنسان.”
بقلم: الإعلامية الأردنية الدكتورة ليندا الكركي
عضو الاتحاد العربي للعمل التطوعي –
