صدى الشعب – كتبت آيات العتوم
في إحدى جلسات الاستشارة، جلس شاب وزوجته أمامي،
هادئين أكثر من اللازم.
قال لي بهدوء:
“إحنا ما بنتخانق كثير…
بس كل واحد فينا حاسس حاله لحاله.”
ما كان في خيانة،
ولا مشكلة كبيرة،
ولا نية سيئة.
كان في شي أخطر:
دخلوا الزواج وهم مفكّرين
إن الحب لحاله بكفي،
وإن الاختلاف رح يزبط مع الوقت.
الوقت مرّ…
وما حدا تعلّم كيف يحكي،
ولا كيف يسمع،
ولا كيف يكون سند وقت التعب.
وهون فهمت ليش كثير علاقات
ما بتخرب فجأة،
بتتعب بصمت.
كثير من الشباب اليوم يدخلوا الزواج وهم مقتنعين إنو
“الأمور بتمشي لحالها”
وإنو الحب لحاله كفيل يحل كل شيء.
النية الطيبة مهمة، بس لحالها ما بتكفي.
الزواج مش خطوة عفوية،
هو مشروع حياة،
ومثل أي مشروع مهم… بدّه استعداد، ووعي، وشغل مشترك.
الاختيار الواعي مش تعقيد
الوعي في الاختيار مش إنك تدوّر على شخص كامل،
ولا إنك تخاف من الزواج.
الوعي إنك تعرف نفسك قبل ما تختار غيرك:
- كيف بتتعامل مع الخلاف؟
- بتعرف تحكي عن مشاعرك بدون هجوم؟
- شو حدودك واحتياجاتك الحقيقية؟
الاختيار الواعي من البداية
بيحميك من تعب كبير لاحقاً.
أول الزواج بدّه تفرّغ واهتمام
بداية الزواج مش بس تأثيث بيت
ولا بس تأمين دخل.
هي مرحلة تأسيس:
تبنوا فيها لغة مشتركة:
كيف نحكي؟
كيف نختلف بدون ما نجرح؟
كيف نكون سند لبعض وقت التعب؟
هاي المرحلة بدها: - تعلّم
- قراءة
- سؤال
- وتجربة واعية
المهارات الزوجية مش فطرية
التواصل، الاحتواء، إدارة الغضب، احترام الاختلاف…
هاي مهارات بتتعلّم.
مش ضعف إنك تتعلّم،
الضعف إنك تفترض إنك بتعرف كل شيء.
القوة الحقيقية إنك تقول:
“أنا محتاج أتعلم عشان علاقتي تنجح.”
الثقة ما بتيجي صدفة… الثقة تُبنى
الثقة: - ما بتنفرض
- وما بتيجي بالكلام
- وما بتنبنى بالوعود
الثقة تُبنى من المواقف اليومية: - لما أكون صادق حتى وأنا غلطان
- لما أكون ثابت في تصرفاتي
- لما أحترم ضعف شريكي وما أستغله
- لما أكون واضح، مش مراوغ
الثقة الحقيقية هي إحساس الأمان
إن اللي قدامك رح يكون معك…
مش ضدك.
التقبّل أساس العلاقة
واحدة من أكبر الأخطاء إننا ندخل الزواج بعقلية:
“رح أغيّره مع الوقت”
التقبّل مش معناه نرضى بكل شيء،
ولا نلغي أنفسنا،
لكن معناه نكون صادقين:
اخترنا هذا الشخص شريكاً كما هو،
مش كمشروع تعديل أو كسر.
نفرّق بين: - طبع يمكن التعايش معه
- وسلوك يحتاج وعي وحدود
كسر الشريك أو محاولة تغييره بالقوة: - بتخلق مقاومة
- بتضعف الثقة
- وبتقتل الأمان
التغيير بقوة ناعمة
في تصرفات غير مقبولة؟
أكيد.
لكن التغيير الصحي ما بيكون بالصدام.
التغيير يكون بـ: - الحوار
- الوضوح
- الثبات
- والقدوة
قوة ناعمة… مش ضغط.
وعي… مش تهديد.
والأهم:
التغيير الحقيقي يبدأ من أنفسنا.
اسأل بدري… مش بعد ما تتعقّد الأمور
واحدة من أكبر الأخطاء إننا ننتظر لحد ما تتفاقم المشاكل.
السؤال وطلب المشورة من أصحاب الخبرة والاختصاص: - مش عيب
- مش ضعف
- ومش دليل فشل
بالعكس، هو وعي وحماية للعلاقة
قبل ما تتأذى..
الوعي متعب… بس الجهل أتعب
كثير ناس بتختار السطحية لأنّها أسهل و أسرع و ما بدها جهد.
بس اللي بتهرّب من الوعي اليوم،
رح تتعب أكتر بكثير بكرا.
الوعي له ضريبة،
بس الجهل فاتورته أعلى…
وغالباً بتندفع على شكل تعب نفسي، وبعد، ووحدة داخل العلاقة.
الزواج الناجح مش حظ،
ولا ضربة حب،
هو اختيار واعي،
وتعلّم مستمر،
وثقة تُبنى بالمواقف،
وتقبّل باحترام،
وتغيير يبدأ من الذات…
واللي يستثمر في بداية الطريق،
بيحصد أمان وسند حقيقي
لما يكبر… ولما يضعف.
