صدى الشعب – كتبت رولا حبش
يمكن أحياناً بنمشي بحياتنا وبنفكر إنو ما عنا شي مميز أو إنو نقاط قوتنا محدودة، بس الحقيقة إنو كل واحد فينا عنده بذرة موهبة بانتظار تنمو وتكبر… والفرق إنو في ناس بتجرب وبتكتشف هالقوة، وناس بتضل حابسة حالها بجملة “ما بعرف” أو “مش رح أقدر”
أنا مثلاً ما كنت متخيلة إني بقدر أكتب… ما كنت شايفة إنو عندي هالقدرة، بس لما قررت أجرب وأمسك القلم وأخلي قلبي يحكي، اكتشفت إنو الكتابة عشقي، وإنها باب بيوصلني لذاتي وبيعطيني طاقة وفرح كبير
قوتك مش بالضرورة تكون مثل غيرك… يمكن تكون في فنك، أو بصوتك، أو بطريقة تعبيرك، أو بشغفك تجاه مهنة بتحبها… يمكن تكون بقدرتك على مساعدة الناس، أو بإنك تعرف تسمع وتحتوي غيرك… الإبداع مش شكل واحد، وكل إنسان عنده بصمته اللي بتميزه عن الكل
المهم إنك تسمح لحالك تجرّب… تخطو خطوة صغيرة وتفتح باب جديد، لأن ولا حدا بيكتشف قوته وهو واقف مكانه. كل تجربة، كل محاولة، كل مغامرة بسيطة ممكن تكشفلك جوهرة جواك وتخليك تبرع بمجالك وتكون مميز فعلاً
صدقني… جواك قوة أكبر بكتير مما بتتوقع. يمكن لسا ما بينت، بس أول ما تسمح إلها تطلع، رح تشوف كيف حياتك رح تتغيّر وتاخد معنى أجمل وأعمق
ابدأ اليوم… وخليك متأكد إنك النسخة الأقوى من نفسك، والأجمل لسا ما طلع …
محبتي رولا
